మోదీ పర్యటన ఎఫెక్ట్.. మహానాడు వేదికపై ఉత్కంఠ.. శ్రీకాకుళం నుంచి నెల్లూరుకు మార్పు?

తెలుగుదేశం పార్టీ ప్రతిష్ఠాత్మకంగా నిర్వహించే వార్షిక 'మహానాడు' వేదికపై గందరగోళం నెలకొంది. ఈసారి పసుపు పండుగను శ్రీకాకుళం జిల్లాలో ఘనంగా జరపాలని పార్టీ అధిష్ఠానం మొదట నిర్ణయించింది. మే 27, 28, 29 తేదీల్లో సిక్కోలు వేదికగా ఈ కార్యక్రమాన్ని నిర్వహించేందుకు సన్నాహాలు కూడా ప్రారంభమయ్యాయి. అయితే, తాజా పరిణామాల నేపథ్యంలో వేదికను శ్రీకాకుళం నుంచి నెల్లూరుకు మార్చే అవకాశం ఉందనే ప్రచారం జోరుగా సాగుతోంది. ప్రధానమంత్రి నరేంద్ర మోదీ పర్యటనే ఈ మార్పుకు కారణమని తెలుస్తోంది.

జూన్ నెలలో భోగాపురం అంతర్జాతీయ విమానాశ్రయాన్ని ప్రారంభించేందుకు ప్రధాని మోదీ ఉత్తరాంధ్రలో పర్యటించే అవకాశం ఉంది. ఈ పర్యటన సందర్భంగా ఆయన మరికొన్ని అభివృద్ధి కార్యక్రమాల్లో కూడా పాల్గొనవచ్చని అంచనా వేస్తున్నారు. ప్రధాని పర్యటన ఖరారైతే భద్రతా ఏర్పాట్లు, అధికార యంత్రాంగం సన్నద్ధత వంటి అంశాల దృష్ట్యా అదే సమయంలో శ్రీకాకుళంలో భారీ ఎత్తున మహానాడు నిర్వహించడం ఇబ్బందికరంగా మారుతుందని టీడీపీ నాయకత్వం భావిస్తున్నట్లు సమాచారం. ఒకే ప్రాంతంలో రెండు పెద్ద కార్యక్రమాలు జరగడం వల్ల ఎదురయ్యే సవాళ్లను దృష్టిలో ఉంచుకుని, మహానాడు వేదిక మార్పుపై పునరాలోచనలో పడినట్లు తెలుస్తోంది.

ఈ క్రమంలోనే ప్రత్యామ్నాయ వేదికగా నెల్లూరు జిల్లాను టీడీపీ అధిష్ఠానం పరిశీలిస్తున్నట్లు పార్టీ వర్గాల సమాచారం. నెల్లూరులో మహానాడు నిర్వహణకు అనువైన ప్రదేశాలు, రవాణా సౌకర్యాలు, వసతి, స్థానిక నేతల సమన్వయం వంటి అంశాలపై ఆరా తీస్తున్నట్లు చెబుతున్నారు. ఒకవేళ వేదికను ఉత్తరాంధ్ర నుంచి కోస్తాలోని నెల్లూరుకు మారిస్తే, శ్రీకాకుళం నేతలు, కార్యకర్తలు ఎలా స్పందిస్తారనే అంశంపై కూడా చర్చ జరుగుతోంది.

గతేడాది టీడీపీ మహానాడును కడపలో నిర్వహించిన సంగతి తెలిసిందే. ప్రస్తుతం శ్రీకాకుళం నుంచి నెల్లూరుకు వేదిక మార్పు అంశం పరిశీలన దశలోనే ఉందని, దీనిపై టీడీపీ అధినేత చంద్రబాబు త్వరలోనే తుది నిర్ణయం తీసుకుంటారని పార్టీ ముఖ్య నేతలు చెబుతున్నారు. మొత్తం మీద టీడీపీ మహానాడు వేదికపై నెలకొన్న ఈ ఉత్కంఠకు పార్టీ అధికారిక ప్రకటనతోనే తెరపడే అవకాశం ఉంది.